Plantun de Prouvènço

Pèr coumpara dos planto d'encò nostre

Carlina lanata & Cyperus esculentus

Carlina lanata

Asteraceae Compositae

Nom en français : Carline laineuse.

Descripcioun :
La cardinello-lanudo es uno planto de l'an pulèu raro au nostre aleva dins la plano de coustiero mounte se pòu trouba pèr endré. Sèmblo, emé lou rescaufamen, remounta vers l'uba. Li flour coumpausado soun grosso en raport emé la taio de la planto. Li bratèio dóu dedins soun pourpro à roso.

Usanço :
Èi bessai manjadisso coume lis àutri cardinello, mai avèn pas d'entresigne segur.

Port : Erbo
Taio : 10 à 30 cm
Fueio : alterno
Tipe bioulougico : Teroufite
Cicle bioulougico : Planto de l'an

Gènre : Carlina
Famiho : Asteraceae
Famiho classico : Compositae
Tribu : Cardueae
Ordre : Asterales

Coulour de la flour : Roso
Petalo : >6
Ø (o loungour) enflourejado : 2 à 3 cm
Flourido : Printèms - Estiéu

Sòu : Ca
Autour basso e auto : 0 à 600 m
Aparado : Noun
Jun à avoust

Liò : Ermas - Tepiero seco
Estànci : Termoumediterran à Mesoumediterran
Couroulougi : Estenoumediterrano
Ref. sc. : Carlina lanata L., 1753

Triangle(-manjadis)

Cyperus esculentus

Cyperaceae

Nom en français : Souchet comestible.

Descripcioun :
Lou triangle-manjadis trachis dins li limas de ribiero o li culturo. Pèr l'ouro n'i'a pas gaire au nostre, soulamen un pau au couchant. Se recounèis à sis enflourejado jauno daurado e subretout à si cabosso o tubercule. Douno un pau d'èr à Cyperus rotundus que fai de cabosso negro. La varieta presentado eici, Leptostachyus, èi naturalisado (óurigino Americo de l'uba).

Usanço :
Coume lou dis soun noum es uno planto manjadisso. En Espagno s'adoubo emé lou tubercule l'horchata de chufa, valènt-à-dire l'ourjado de triangle. Se fai tambèn un òli de qualita, richo en vitamino E e bon pèr la pèu.